කාන්තාර පළඟැටියන් හමුවේ ලංකාව අවදානමට

Article by- Sahanma Nipuni Mindula
Design by- ZSJP media crew_2020

සාමාන්ය ස්වභාවික පරිසරයේ අපි දකින “පළඟැටියන් හෝ තණකොළ පෙත්තන්” තනිව හුද කලාව දිවි ගෙවූවත් විශේෂ අවස්ථාවලදී, බොහෝ විට “පතංගයා(locust)” සමූහ වාසි වේ. ඔවුන් සාමාන්‍ය පළඟැටියන් හෝ තණකොළ පෙත්තන් ට වඩා විශාල වේ. මේ සත්ත්ව කාණ්ඩවල ජීවන චක්‍රය අවදි දෙකකින් යුතු . මුල් අදියරේ දී තැන – තැන, පැන – පැන යන මොවුන් දෙවන අදියරේ දී තටු ලබයි. එවිට ඉතා දුර බැහැර එක එල්ලේ පියෑඹීමේ හැකියාව මොවුන්ට ලැබෙයි. රටින් රට මෙන්ම මහද්වීප හරහා ද සිදුවෙන මේ පළඟැටි සමූහ පර්යටනය සඳහා සතුන් බිලියන ගණනකින් සමන්විත බව නිරීක්ෂණය කර ඇත.

වර්තමානයේ දී ලොව ම මුහුණ දෙන Covid-19 වසංගත තත්ත්වයට පෙර මිනිසාගේ ක්‍රියාවන් නිසා විපරීත වූ ලෝක කාලගුණය මෙන්ම, දේශගුණික තත්ත්වයන් එතෙක් හුදකලා දිවියක් ගෙවූ “කාන්තාර පළගැටියන්” මහත් කලහකාරී, විනාශ කාරීන් පිරිසක් බවට පත් කිරීමට හේතු සාධක වූ බව විද්‍යාඥයන් පවසති. දිනකදි සාමාන්‍යයෙන් කිලෝ මීටර් දෙසීයක් (200 km) පමණ දුර පියඹා යන මොවුන් , එක් දිනක් තුල 300 km පමණ වන ” රතු මුහුද” තරණය කළ බව වාර්තා වේ. මේ පියෑඹීම අතරතුර ආහාරයට ගත හැකි ඕනෑම දෙයක් කුස තුළට ගන්නට මොවුන් සමත් වේ . පර්යේෂකයන් පවසන්නේ මොවුන් තම ශරීර බරට සමාන ප්‍රමාණයක් එක් වරකට ආහාරයට ගන්නා බවයි එක්සත් ජාතීන්ගේ “කෘෂිකර්ම හා ආහාර පිලිබඳ සංවිධානය” පවසන්නේ මෙවන් එක් රංචුවක් වසරකට පුද්ගලයන් දෙදහස් පන්සියයක් (2500) පමණ පෝෂණය කළ හැකි ආහාර ප්‍රමාණයක් එක මොහොතකින් විනාශ කර දමන බවයි. සමහර පර්යේෂණ වාර්තා වලට අනුව “පැරීසිය” තරම් විශාල රංචුවක් එහි වෙසෙන ජනතාවගේ දෛනික ආහාර ප්‍රමාණයට සමාන ආහාර ප්‍රමාණයක් මොහොතකින් ගිල දමන බව පැවසෙනවා.

හිතකර තත්ත්ව යටතේ දිගින් දිගට සිදුවන ප්‍රජනන ක්‍රියා හමුවේ ගුණනය වන මෙම පතංගයන් 2019 වසරේ අරාබි අර්ධද්වීපයේ “රූබි – අල් කාලි ” ප්‍රදේශයට ඇද වැටුණු මහ වැසි සමගින් තම ආක්‍රමණය ආරම්භ කරන ලදි. අරාබිය මෙන්ම අප්‍රිකානු කලාපයද ආක්‍රමණය කළ මෙම උවදුර, මීට පෙර කෙන්යාව ආක්‍රමණය කර තිබුණේ වසර හැත්තෑවකට ( 70 ) පමණ පෙරදීයි. ලොව ම හොඳින් දන්නා පරිදි ආහාර අර්බුදයේ පත්ලේ සිටින සෝමාලියාව – ඉතියෝපියාව මෙන්ම අද මෙම ‘පතංගයන්’ ගේ ග්‍රහණයට නතුව තිබෙන ඉන්දියාව මෙවන් උවදුරකට මුහුණ දෙන්නේ වසර විසි පහකට (25) පසුවයි. 2019 ජුනි මස වන විට අප්‍රිකානු රටවල් රැසක් ද , සෞදි අරාබිය, යේමනය, ඊජිප්තුව හ ඕමානය වැනි රටවල් ද මෙම උවදුරට දැඩිව මුහුණදී තිබුණි. ඒ සමගින් ඇති වූ දැඩි ආහාර අර්බුදය හමුවේ ඔවුන්ට Covid-19 ට මුහුණ දීමට සිදු වීම දෛවෝපගත සිදුවීමක්.

Covid 19 වසංගතයක් ලෙසින් ලෝකය පුරා ව්‍යාප්ත වෙද්දී මෙම පතංග සේනාවන් ඉරානය – පාකිස්ථානය හරහා ඉන්දියාවේ බටහිර හා මධ්‍යම ප්‍රදේශවලට ඇතුළු වී ඇති අතර , මේ වන විට ඔවුන් ඉන්දියාවේ හෙක්ටයාර 50,000 පමණ වගා බිම් විනාශ කර ඇති බවයි වාර්තා වන්නේ. Covid – 19 න් මේ වන විට දැඩි ලෙස පහර කන ඉන්දියානුවන් , දශක තුනක කාලයකදී එල්ල වූ භයානකම පලගැටි උවදුරට මුහුණ දී ඇති බවත්, බිලියන ගණනක පළඟැටියන් ඩ්‍රෝන තාක්ෂනය ඔස්සේ, කෘමි නාශක මගින් හෝ වෙනයම් ක්‍රමයකින් විනාශ කළ නොහැකි බව එරට කෘෂිකර්ම බලධාරීන් පවසා සිටියි. මීට පෙර 2003 – 2005 අතර සිදු වූ මෙවන් ” පළඟැටි ” ආක්‍රමණයක් නිසා ඇමරිකානු ඇමරිකානු ඩොලර් බිලියන 2.5 ක අලාභයක් වූ බව එක්සත් ජාතීන්ගේ වාර්තා පවසයි. ඔවුන්ගේ තක්සේරු වලට අනුව ලෝක වාසීන්ගෙන් දහයක ගෙන් එක් අයකුගේ ජීවනෝපාය ට මෙම උවදුර බලපාන බව වාර්තාවේ .

කෙසේ වෙතත් මේ වන විට Covid 19 සාර්ථකව නියාමනය කරමින් සිටින ශ්‍රී ලංකාව අබියසට ම මෙම කාන්තාර පළගැටි උවදුර පැමිණ ඇත. රට තුළ කිසියම් හෝ තැනක මෙම රූප ලක්ෂණයෙන් යුතු පළඟැටියන් දුටුවහොත් ළඟම ඇති කෘෂි නිලධාරී කාර්යාලය වෙත ඒ පිළිබඳ දැනුවත් කිරීමට සියලු දෙනා සැලකිලිමත් වන්න. සියලු ලක්වාසීන් කොරෝනා වෛරසය හමුවේ මෙන් විනයගරුකව, අවධානයෙන් සිටිය හොත් මෙම මාරාන්තික ආක්‍රමණිකයා ගෙන් බේරීමට මෙන් , ඔවුන් විනාශ කිරීමට ද හැකි වනු ඇත.